ប្រទេសថៃនឹងអភិវឌ្ឍកំពង់ផែស្ងួតនៅភាគឦសាន ជាមជ្ឈមណ្ឌលតភ្ជាប់ក្នុងតំបន់

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ លោក Chai Wacharonke អ្នកនាំពាក្យរដ្ឋាភិបាលបាននិយាយថា ប្រទេសថៃកំពុងអភិវឌ្ឍកំពង់ផែស្ងួតភាគ ឦសាននៃខេត្ត Nong Khai ជាមជ្ឈមណ្ឌលតភ្ជាប់ក្នុងតំបន់ និងជាច្រកត្រួតពិនិត្យព្រំដែនសាកល្បង។ នេះបើតាមការចេញផ្សាយដោយសារព័ត៌មាន Xinhua។ លោក Chai បាននិយាយនៅក្នុងសេចក្តីថ្លែងការណ៍មួយ ដោយដកស្រង់សម្តីលោក Srettha Thavisin នាយករដ្ឋមន្ត្រី ក្នុងដំណើរបំពេញទស្សនកិច្ចទៅកាន់ខេត្ត Nong Khai ជាប់ព្រំដែនឡាវថា ទីភ្នាក់ងារពាក់ព័ន្ធនឹងសហការគ្នាដើម្បីសម្រួលពាណិជ្ជកម្មលើគ្រប់វិស័យ ធ្វើឱ្យប្រទេសមានការវិនិយោគដ៏ស័ក្តិសមជាមួយនឹងពាណិជ្ជកម្មឆ្លងព្រំដែន និងការដឹកជញ្ជូនលឿន។ លោកបានបន្តថា ការអនុវត្តនៃ "One Stop Service" ដែលរួមបញ្ចូលគ្នានូវសេវាកម្មរដ្ឋទាំងអស់ទៅក្នុងវេទិកាតែមួយនឹងធ្វើឲ្យប្រសើរឡើង នូវប្រសិទ្ធភាពនៃការចរចាអាជីវកម្ម និងការផ្លាស់ប្តូរទំនិញរវាងវិនិយោគិន និងសហគ្រិន។ លោកបានមានប្រសាសន៍ថា នាយករដ្ឋមន្ត្រីក៏បានណែនាំដល់អាជ្ញាធរពង្រឹងកិច្ចសហប្រតិបត្តិការ កាត់បន្ថយឧបសគ្គចំពោះការដឹកជញ្ជូនអន្តរជាតិ កែលម្អបទប្បញ្ញត្តិ ច្បាប់ពាក់ព័ន្ធ និងបង្កើតដំណើរការដឹកជញ្ជូនតាមប្រព័ន្ធអេឡិចត្រូនិកប្រកបដោយភាពរលូន៕