ប្រទេសថៃនឹងជំរុញកំណើនប្រកបដោយចីរភាព តាមរយៈសេដ្ឋកិច្ចដែលជំរុញដោយនវានុវត្តន៍

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ នាយករដ្ឋមន្ត្រីថៃ ស្រេតថា ថាវីស៊ីន (Srettha Thavisin) បាននិយាយថា ប្រទេសថៃកំពុងផ្លាស់ប្តូរឆ្ពោះទៅរកបច្ចេកវិទ្យាដែលមានតម្លៃខ្ពស់ និងសេដ្ឋកិច្ចដែលជំរុញដោយនវានុវត្តន៍សម្រាប់កំណើនប្រកបដោយនិរន្តរភាព ក្នុងពេលមានការរំខាន និងបញ្ហាប្រឈមជាច្រើន។ នេះបើតាមការចេញផ្សាយដោយសារព័ត៌មាន Xinhua។ លោក ស្រេតថា បានប្រាប់កម្មវិធី Foreign Industrial Club Gala Dinner ថា បន្ទាប់ពីមាន "វិបត្តិនយោបាយ" ប្រទេសនេះចាំបាច់ត្រូវមានផែនការនាពេលអនាគត ដើម្បីរីកចម្រើនក្នុងពេលមានការប្រកួតប្រជែងកាន់តែខ្លាំងឡើង នៃសេដ្ឋកិច្ចពិភពលោក ជម្លោះអន្តរជាតិ ការផ្លាស់ប្តូរសណ្តាប់ធ្នាប់ពិភពលោក និងការប្រែប្រួលអាកាសធាតុ។ នៅក្នុងសុន្ទរកថាសំខាន់របស់លោក ស្រេតថា បានលើកឡើងពីតម្រូវការបន្ទាន់ក្នុងការធ្វើឱ្យសេដ្ឋកិច្ចដើរលើផ្លូវ និងរៀបចំប្រទេសឱ្យទទួលបានជោគជ័យក្នុងរយៈពេលវែង តាមរយៈការអនុវត្តវិធានការជំរុញ និងការគាំទ្រ ការបង្កើតឱកាសសម្រាប់ប្រជាជនថៃ ការពង្រីកការវិនិយោគ និងអាជីវកម្ម។ លោកបានបន្តថា ជាផ្នែកសំខាន់នៃយុទ្ធសាស្ត្ររបស់រដ្ឋាភិបាល ប្រទេសថៃកំពុងប្រែក្លាយពីក្រុមហ៊ុនផលិតទំនិញមូលដ្ឋាន និងផលិតផលកសិកម្មបឋម ទៅជាមជ្ឈមណ្ឌលសម្រាប់ការផលិតប្រកបដោយភាពច្នៃប្រឌិត៕