ADB នឹងផ្តល់ហិរញ្ញប្បទាន អាកាសធាតុ ចំនួន ១០ ពាន់ លាន ដុល្លារ ដល់ ហ្វីលីពីន

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ ធនាគារអភិវឌ្ឍន៍អាស៊ី (ADB) បាននិយាយថា ខ្លួននឹងរៀបចំកម្មវិធីហិរញ្ញប្បទានអាកាស ធាតុចំនួន ១០ ពាន់លានដុល្លារសម្រាប់ប្រទេសហ្វីលីពីនចន្លោះពីឆ្នាំ ២០២៤ ដល់ឆ្នាំ ២០២៩។  នេះបើយោងតាមការចេញផ្សាយដោយសារព័ត៌មាន Xinhua។ ការសម្រេចចិត្តនេះត្រូវបានប្រកាសដោយលោក Masatsugu Asakawa ប្រធាន ADB ក្នុងកិច្ចសន្ទនាកម្រិតខ្ពស់មួយស្តីពីសម្ព័ន្ធផ្តល់ហិរញ្ញប្បទាននៅក្នុងសន្និសីទអាកាសធាតុប្រចាំឆ្នាំរបស់អង្គការ សហប្រជាជាតិដែលបានធ្វើឡើងនៅទីក្រុងឌូបៃ ប្រទេសអារ៉ាប់រួម។ លោក Asakawa បាននិយាយថា "ការប្រយុទ្ធប្រឆាំងនឹងបម្រែបម្រួលអាកាសធាតុ នឹងត្រូវឈ្នះ ឬចាញ់នៅអាស៊ី និងប៉ាស៊ីហ្វិក ហើយគ្មានកន្លែងណាបង្ហាញឱ្យឃើញច្បាស់ជាងនៅក្នុងប្រទេសហ្វីលីពីន"។ លោកបានបន្ថែមថា ADB ក៏នឹងបន្តកិច្ចខិតខំប្រឹងប្រែងដើម្បីប្រមូលហិរញ្ញវត្ថុអាកាសធាតុបន្ថែមពីវិស័យឯកជន ដៃគូសហហិរញ្ញប្ប ទាន និងប្រភពផ្សេងៗទៀត។ ប្រទេសហ្វីលីពីនស្ថិតនៅលំដាប់កំពូលសម្រាប់ប្រទេសដែលងាយរងគ្រោះនឹងគ្រោះមហន្តរាយបំផុតនៅក្នុងពិភពលោក។ ADB បាននិយាយថា ហិរញ្ញប្បទានអាកាស ធាតុរបស់ខ្លួននៅក្នុងប្រទេសហ្វីលីពីន នឹងជួយកែលម្អភាពធន់នឹងអាកាសធាតុនៃសហគមន៍ ប្រព័ន្ធអេកូឡូស៊ី និងសេដ្ឋកិច្ច៕